Monday, February 25, 2008

شخابيط

اوقات بحس ان كل حاجة جوايا وحواليا عليها شخبطة
مكتوبة بطريقة مش واضحة
او بمعنى اصح اتكتبت واترتبت وبعدين اتشخبط عليها
ومش عارفة اقراها
بحاول اشبه عليها او اجتهد فى انى افهم معنى اللى مكتوب تحت الشخبطة


وممكن احاول اخمن شوية كلام شبه اللى مكتوب عشان اقنع نفسى انى فهمت .. لمجرد انى محتاجة قوى افهم اللى مكتوب جوايا
او احساسى بيطغى عليا وبحاول اترجم اللى تحت الشخبطة زى ما انا محتاجة اقراه

بس لما اقعد مع نفسى تانى
اكتشف انى ما فسرتش اللى تحت الشخابيط

وارجع واقول خلاص خلى كل حاجة زى ما هى متشخبط عليها
يمكن لو فهمت كل حاجة ما احسش انى مرتاحة


وارجع احاول تانى
مرة اسيب كل حاجة واعمل نفسى مش شايفة
ومرة احاول افهم
واول ما اقرب اوصل اخاف واهرب من جديد

واقول شخابيط

9 comments:

meshmesha said...

السلام عليكم
يكفى شرف المحاوله يا لحظة تأمل
و يكفى انك بتتأملى و بتحاولى حتى لو تعبتى....المهم فى الاخر انك تكونى واضحه و صريحه مع نفسك
اما الخوف من انك تفهمى او تتضح لك الصوره كامله..فده لأن بالرغم من صغر سنك يمكن تكونى مرتى بالأصعب و الاكثر قسوه...فخوفك هو نتيجة عدم استحمالك من انك تمرى بالاكثر اكثر منه قسوه

ربنا يرضيكى و يسعدك و يوفقك

مشمشه

dally said...

ولاتزعلى نفسك هاتى اكبر استيكه وامسحى كل الشخبيط ومتخليش ولا شخبوطايه واحده هتلاقى نفسك بيضاااااااااااااااااااء ومرتاااااااااااااااااحاااا ربنا يسعدك ويعينك

قلوب بتغنى said...

شخابيط بس
دى عامله زى المتاهه يابنتى والله
كل ما توصلى وتقولى خلاص المخرج هناك اهو تبصى تلاقى لسه فى خطوط كتير متعرجه مش واضح فيها الطريق
بس عارفه لو معاكى رفاقه كويسه وايدين كتير دافين
تبقى الخطوط واضحه ويبقى الطريق سليم
اكون مبسوطه لو زورتى مدونتى وبقينا اصحاب
اشطات

Eman Eltaher said...

كلنا كده على فكرة
الانسان كتير مش بيفهم حاجات كتير ف نفسه ف أعماقه ف حياته
متفتكريش انه المشكلة عندك بس

عجبتنى اوى فكرة البوست بتاعك و الصورة اللى حطاها عنك

دى اول زيارة ليكى و يارب تعجبك مدونتى و مواضيعا

الأستاذ said...

فيه في حياتنا شخابيط كتير والأصعب من كدة إننا اللي كاتبنها ومش عارفين نقرأها لكن لازم نحاول نفسرها قبل فوات الأوان
تحياتي

لحظة تأمل said...

مشمشة

وعليكم السلام
يمكن عندك حق فى كلامك يا صاحبتى
انا فعلا ساعات بخاف من انى اشوف الاسوا
ربنا يخليكى ليا


dally

ياسلاااااام
ياريت تدلينى على طريق الاستيكة اللى تعمل كل ده وانا مستعدة امسح كل الشخابيط
مبسوطة بزيارتك وياريت تكتبى دايما لان كلامك كله يمس القلب


قلوب بتغنى

هى فعلا متاهة بس انا عندى امل احلها فى يوم من الايام
وزى ما بتقولى محتاجة اصحاب كتير وايدين دافيين .. وهما حواليا الحمد لله
مدونتك جميلة اوى
اشطات :)


eman

تعرفى فكرة عدم الفهم ديه ساعات بتتعب اوى
فى نفسك وفى حياتك وفى كل حاجة

متشكرة على زيارتك وتعليقك على الصورة
ومدونتك بقى دمها خفيف اوى زى صاحبتها
تحياتى واتمنى تزورينى دايما


الاستاذ

ياريت فعلا نعرف نفسرها بعد فوات الاوان
متشكرة لزيارتك
وكل سنة وانت طيب
وفعلا دخلتنى عالمك الافتراضى يا استاذ
تحياتى

سنووايت said...

احا بنتولد وكل شيء حوالينا مجرد شخابيط ومع كل لحظة في حياتنا بنقدر نمسك كل شخبوطة ونفكها ونفهمها ونكبر شوية ونفهم شخابيط اكتر بس في نفس الوقت بنكون مولودين صفحة بيضاء من جوانا ومع كل لحظةفي حياتنا بنلاقي حاجات كتير جوانا بقت مجرد شخابيط

لحظة تأمل said...

سنووايت

فعلا احنا بنتولد صفحة بيضا وبعدين بنتملى شخابيط
بس ياريت نعرف نفسرها قبل تكتر اكتر من كده
متشكرة لزيارتك واحييكى على مدونتك

Anonymous said...

سلام عليكم
موضوع فيه رقة داخلية عالية و الردود على الموضوع جميلة قوي و مخلياه حالة حوار مع حالة التامل بتاعة البشمهندسة مي :) بس حالة حوار جميلة قوي
انا في رأي ان الشخابيط دي دايما سببها الخوف من الفشل او الجرح
لو الانسان خطط كويس قوي لبكره و بدأ ينفذ المخطط ده و يصبر على اي مشاكل تواجه المخطط و ساب النتيجة لربنا سبحانه و تعالى مع اعلانه مسبقا انه راضي بيها لانها اكيد هي الخير من عند رب العالمين
يبقى في الحالة دي ان شاء الله مش هيبقى فيه شخابيط ولا حاجه
سلام عليكم