بعد صباح الخير

ياااه .. من حوالى شهر كانت الحاجات اللى بعملها بعد كلمة صباح الخير كتير اوى

وبجد وحشونى جدا وافتقدتهم بعد ما ميعاد الشغل بقى بدرى

كنت بصحى على صوت ماما وهى عارفة انى هفوق اول ما اسمع صوت الدكتور احمد عمر هاشم فى اذاعة القران الكريم وهو بيشرح حديث للرسول عليه الصلاة والسلام

وبعدها علطول خمس دقايق للشيخ الشعراوى

واول ما افوق لازم اسمع الصباح الجميل بتاع فيروز وياسلام لو لحقت اسمع حاجة لعمر خيرت

وكل ده بعمله وانا بجرى طبعا عشان الحق احضر حاجاتى

ومعنى انى سمعت فيروز وشغالة جرى فى الشقة..ده معناه انى خلاص صحيت

وانا لما اصحى بتبقى مشكلة افضل اعاكس فى ماما واصحى اخويا واعمل دوشة فى البيت لانى اكتر وقت بحبه فى اليوم هو الصبح

وطبعا بيبقى جنان يعنى

وبما انى متاخرة كالعادة وبنزل مع ماما فى نفس الميعاد _ايام ما كنا بننزل سوا_ قبل ما انزل لوحدى :(

كنت دايما احب اعاكسها واقولها انتى ماخرانى كده دايما .. شفتى انا شاطرة ازاى وبخلص حاجاتى بدرى

وطبعا كان لازم تعدينى الشارع كل يوم زى الاطفال وتبقى مصرة انها ما تمشيش الا لما اركب وتطمن عليا

ولازم اخدلى تريقة حلوة من سواق التاكسى اللى ماما لازم هى اللى توقفه الصبح

ويقولى هى دى مامتك ابقى خدى بالك من الطريق .. انتى عارفة الطريق كويس

وطبعا بفضل اضحك بعدها على رد فعل السواق وهو متنح لما يعرف انى رايحة الشغل مش المدرسة

...

ياسلام كان احلى صباح

لكن دلوقتى بقيت اصحى وكل اللى الحق اعمله انى اقول صباح الخير وانزل

...

شوية الحاجات اللى كانت بعد كلمة صباح الخير ديه هى اللى كانت بتحسسنى باليوم

مع انى مش هنكر ان اكتر ميزة فى النزول بدرى قوى كده انى بشوف الشمس وهى لسه بتفتح عنيها على الدنيا

اهم حاجة بقى انى صحيت بدرى او صحيت متاخر مش هبطل اقول صباح الخير وانا مبتسمة