قـلــــوب

بحر الحياة مليان بغرقى الحياة

صرخت خش الموج فى حلقى ملاه

قارب نجاة .. صرخت قالوا مفيش

غير بس هو الحب قارب نجاة

وعجبى

----------------

ناس بسيطة بس قلوب مفيش زيها .. سيبتهم من فترة واتنقلت شغل جديد بس اثبتولى انى كنت صح وان فعلا العشرة الطيبة هى اللى بتدوم

اول ما اشتغلت معاهم كنت بدافع عن مبدأ مقتنعة بيه .. برغم ان اكتر من حد عارضنى فيه ..

كنت بعاملهم على انهم اخواتى مش بس فنيين ومهندسة

لما الاقى الناس ديه بتتصل بيا دلوقتى بعد ما مشيت وابقى متاكدة انه مش نفاق ولا هما محتاجينلى فى حاجة

غير انهم بيحبونى ولسه فاكرينى بحس انى اسعد انسانة فى الدنيا وانى اخترت صح

ايه كل الحب اللى فى صوتهم ده لما يقولوا وحشتينا

لسه بيعاتبونى انى مشيت ولسه بقولهم مش هلاقى زيكوا تانى

لسه بيحكولى مشاكلهم فى الشغل مع انى مش هقدر احلها

بس بيحكوا لانهم عارفين انى هحس بيهم وانى لسه اختهم

لسه بيفكرونى بمحطة الكهربا واعطالها وساعة الهزار على الغدا مع بعض

ولما كنت بزعق وبنتخانق ونرجع نتصالح تانى

احلى حاجة لما تحس بالحب ده كله من ناس يمكن اكترهم مكملش تعليمه يعنى بيتكلموا من قلوبهم وبيقولوا اللى حاسين بيه

وفعلا مش بيبقى غير الحب هو قارب النجاة

ازاى هغرق ولسه فى ناس حواليا بالطيبة ديه

______________________

مع ان فيهم انسان كان اكتر واحد اتعاملت معاه بالخير ووقفت جمبه وقت شدته

وكان يعز عليا انه يكون اخر انسان ازعله واختلف معاه قبل ما امشى

لانى كنت بمنعه من ظلم زمايله وظلم نفسه قبلها

ولانه مفهمش ونسى كل الخير واكتشفت ان الدنيا والمصالح بتقدر تغير الناس بسرعة

بس لسه مش قادرة ازعل منه ولا اقول غير ربنا يهديله نفسه

يمكن مكلمتوش تانى ومفتكرش هكلمه بس بدعيله بجد انه يقدر يكسب حب زمايله تانى

لانه هيخسر كتير من غيرهم