لما تحس انك فرحان قوى وبعدين زعلان قوى
وساعات الاتنين فى نفس الوقت
غريبة مش كده ؟؟؟
----------------------------
رحت شغلى الاول من يومين وكنت فرحانة قوى
لما تلاقى كل الناس فرحانين بيك جدا وشايف الفرحة بجد فى عنيهم
الناس كلها كانت بتقولى حمدلله على السلامة انك رجعتلنا
لما قلتلهم انى بس جاية ازورهم .. قالولى احنا عارفين بس خلينا نقولك كده
عشان نحسس نفسنا انك هتقعدى معانا كتير مش بس زيارة
قعدت فى كل الاماكن اللى كنت متعودة عليها .. محسيتش انى غيبت عن المكان كتير
كنت فرحانة بكل الحب اللى شفته
---------------------------
لما جيت اكتب عن فرحة جوايا واحساس بالسعادة
لقيت نفسى تهت لانى بقيت تانى يوم حاسة بكل الحزن اللى فى الدنيا
فقلت خلاص هكتب عن الحزن ده
تانى يوم بقى عندى احساس ان كل حاجة حلوة
ورجعت اقنعت نفسى تانى انى مبسوطة
قلت هكتب برده يمكن افهم
لقيتنى بسال نفسى هو انا حاسة بايه
معرفتش ارد ولا عرفت اكتب
---------------------------
شفت النهاردة طفلين صغيرين
بس الاتنين مع انهم مش بيعرفوا يتكلموا اصلا
كانوا بيبصولى كتير
حسيت وكأن فى عيونهم كلام عايزين يقولوهولى
لدرجة انى فضلت بصالهم يمكن يتكلموا
وبعدين قلت ايه ده دول مكملوش حتى سنة .. ازاى هيتكلموا
جنان ده ولا ايه
----------------------------
ليه لما حد قريب منك يجى يخيرك ما بين حاجتين
يقولك اختار براحتك انا مش هجبرك على حاجة
ولما تختار اللى مش عاجب الشخص ده
يقولك انت حر براحتك .. ده اختيارك
بس فى نفس الوقت يزعل اوى مع ان الناس القريبين منك
عارفين انك مش بتقدر على زعلهم ولا على دموع تشوفها جوا عينهم
فبتختار اللى يريحهم
هو كده مش بيجبروك برده .. طيب وكان ليه الاختيار من الاول
-----------------------------
كنت زعلانة جدا بس حتى دموعى منزلتش
مع انه من النادر ان عينى متدمعش بسرعة
بس الاغرب انى لقيت ابتسامة غريبة
بتنط من جوايا وبتقولى خلاص متزعليش
مفيش حل واضح بس مش هنزعل نفسنا
وكمان الابتسامة يمكن مش هتكبر وتبقى ضحكة
بس كل ما ازعل تنطلى وتقولى متنسينيش انا لسه جواكى
جت منين الابتسامة ديه؟
-----------------------------
كل يوم بشوف اكتر شكل بحبه فى الدنيا
شكل الغروب
الشمس عبارة عن قرص برتقالى اللون حواليها السحاب متجمع
فى اجمل لوحة على وجه الكون
كل يوم وانا راجعة من الشغل بشوفها وافضل بصالها
بحس بمنتهى الراحة اللى فى الدنيا وببتسم ابتسامة تانية خالص
مش بتترسم على وشى الا الوقت ده بس
محستش بكل ده الا النهاردة لما رجعت متاخرة وملحقتهاش
------------------------------
بقالى كتير بكتب
قلت ارجع اقرا اللى كتبته
حسيت باستغراب وسالت نفسى انا اللى كتبت كل ده
ومعرفتش اقول غير
اييييييــه اللخبطة ديه ؟؟؟
16 comments:
أولا السلام عليكم ورحمة الله وبركاته
ثانياً دى أول زياره لمدونتك واسمحيلى قبل أى شىء أحييكى على اسم المدونه..لانى بصراحه بحب المسلسل ده وبحب الدراما الكوريه عموما :)
ثالثاً بقى لخبطتك حلوه اوى..وكتير مننا بيقع فيها
جميل انك طلعتيها بأسلوبك..وده أكيد هيريحك ويشيل عنك
اتمنالك التوفيق
عزيزتى ما تلك المشاعر التى بداخلك فهى مشاعر حساسه بالرغم من عدم انتظامها فى السرد
ولكن عزيزتى قد يشعر الانسان بكم من الفرحه تنساب فى عينبه
وقد يشعر بالحزن ايضا لانه قد يترك تلك الفرحه يوما
فابتسمى يا عزيزتى وانظرى الى قرص الشمس عند الشروق فهو لحظه امل جديده تولد امام عينيكى
كل يوم
فابتسمى مهما كانت الظروف
هى شكلها فيرس فى الجو
لان انا نفس حالتك تقريباً
حاسه باللخبطه فى كل حاجه و مش عارف احدد اى حاجه
بس سيبك انتى اضحكى و خالى الامل دايما موجود
و كل شئ بعد كده هايبقى كويس
انت انسانة حساسة جدا ..ويبدوا انك تملكين قلبا طيبا جدا للغاية ..كل ماذكرتى من اشياء مررتى بها خلال لحظات اللخبطة تعنى انك فى حالة من التأمل والاستكشاف مابين الجد والهزل ..ومابين الحزن والفرح ..بصراحة انا مشيت وراء كل هذه المشاعر فلم اجد الا انسانة رقيقة المشاعر والاحاسيس والحيرة فى نفس الوقت
بصراحة انا نفسى اتلخبطت فى متاهات يومك المتقلبة .. وياله من يوم طويل
تعرفي إني بجد فتحت البلوج في الوقت ده عشان أكتب ومش عارفة أكتب إيه بجد إحساسك جواية غريب أوي بجد يمكن عشان الدنيا هي اللي غريبة وبتحير كل اللي عايشين فيها سبحانك يارب وساعات الواحد بيحس بحاجات ملخبطة ومايعرفش يعمل ايه ويتصرف ازاي ويمكن الأطفال اللي انتي شوفتيهم دول أمل لحياة هاتعيشيها ونظراتهم بيقولولك اضحكي ماحدش واخد منها حاجة والضحكة اللي بجد جاية إن شاء الله..... بس سيبك من ده كله انتي تعبانة ولا ايه وماروحتيش شغلك كتير ليه ممكن تطمنيني .....خاللي بالك من نفسك ياجميل
إيه ده كله ؟
ماسورة كتابة وضربت ولا إيه ؟ ههههههه بهزر طبعا
على فكرة .. هو ده التأمل بالمعنى الحرفى
إنك تنظرى للشئ المألوف بطريقة غير مألوفة
دمتى بكل ود .. تحياتى
السلام عليكم
لحظة تأمل حقيقي مدونتك مليئة بالمشاعر وفيها شيئ خفي بيجذبني اليها لا ادرى ربما لاننى احب التأمل و اجد في الطبيعة مادة لذيذة منعشة تبعث في قلبى الراحة وتنفض من قلبى الشجن كتير لما كون مضيقه بنظر للشجر وابتسم فهذه نعمة من الخالق وللتأمل سر خفى يجعلنا متلخبطين كده ومش على بعض مرة حزن ومرة ابتسام زى اللخبطه اللي انت فيها بالضبط دمت بألف خير
تقبلي مرورى الاول
اللخبطه والتوهان
يالهوي ده شكلها شوطه وجت في الكل
سيببيها لله
وكل حاجه هتتحل
هى صحيح لخبطة بس ده دليل على انها كلام من القلب لسه ما طلوش التميق والتذويق بس برضه انتى تعبانه شوية حاولى تشاركى حد معاكى علشان تترتبى من جواكى
حدوتة مصرية
وعليكم السلام ورحمة الله وبركاته
انا كمان بحب الدراما الكورية جدا
نورتينى وياريت متكونش اخر زيارة
_________________________
romancy
اولا احب اشكرك جدا على كلامك وعلى متابعتك للمدونة
وفعلا السرد مش منتظم لانى كنت متلخبطة ومحاولتش ارتبه بعدها سيبت الكلام زى ما طلع منى
ومتقلقش الابتسامة دايما موجودة وقرص الشمس فى الشروق او فى الغروب بيقدر يرسم ابتسامة على وشى لانه امل جديد بالنسبالى
دمت بخير
____________________
ضد التيار
يارب يشفينا كلنا من الفيرس ده
والامل فى الله دايما موجود
نورتينى بوجودك الجميل
___________________
وميض ابتسامة
اخجلنى كلامك واشكرك عليه
وبصراحة دى مش احداث يوم
دى احداث اسبوع من اللخبطة
اشكرك على مرورك الكريم
________________
Osha
هى فعلا الدنيا محيرة كتير
بس اكيد ده وجه من اوجه جمالها
ومتقلقيش يا قمر
انا كنت بتكلم عن زيارتى لشغلى الاولانى
دايما منورانى بكلامك الجميل
محبتى
د/ رامى شهاب الدين
هههههههه
هى شكلها كده فعلا ماسورة كتابة وضربت
نورتنى وياريت متكونش اخر زيارة
____________
dalia
وعليكم السلام ورحمة الله وبركاته
اشكرك على كلامك الجميل
واسعدنى جدا مرورك الكريم
_________________
كيــارا
كله على الله
شرفتى مدونتى المتواضعة
واسعدنى جدا وجودك
محبتى
______________
قلوب بتغنى
انا فعلا محتاجة شوية ترتيب من جوايا
عشان اللخبطة ديه تروح
دمتى بكل حب
كلامك كلنا نحس فيه
يمكن تتناقضات الحياه
يمنكن احنا ما نفهم انفسنا صح
في وايد احتمالات!
سررت بقرائة التدوينه
تقبل مروري:)
صديقتى العزيزة
ليست لخبطة
كن جميلا تى الوجود جميلا
وما دمت ترين الدنيا بهذا الجمال فلا بد ان بداخلك اجمل
تحياتى دوما
بجد اية اللخبطة الجامدة دى فى المشاعر
بجد ياجميل حدد موقفك
تحياتى لكى باقمر
الادارة االعامة لحزب الاحلام
اقصوصة
فعلا الحياة مليئة بالتناقضات
ولكن سنعيشها برغم كل ما فيها
اسعدنى مرورك الكريم
____________
الازهرى
اشكرك على كلماتك
دمت بخير
شرفت لحظة تامل
_____________
رئيسة حزب الاحلام
اولا احب اشكر الادارة العماة لحزب الاحلام للاهتمام باعضاء الحزب الموقر
:)
واكيد هتنتهى اللخبطة ان شاء الله وهحدد موقفى
شكرا لوجودك الجميل
希望大家都會非常非常幸福美滿快樂健康美麗更希大家活力無限..........................................................
Post a Comment