لسه ربنا موجود وحاسس بيا
لسه موجودة وعايشة برغم كل شئ
لسه عندى ناس بيحبونى بجد
لسه عارفة أقرأ كتاب وأستخبى بين صفحاته
لسه عارفة أحس بكلمات فيروز و منير
لسه مفيش أى حاجة اتحلت لكن لسه عندى أمل فى ربنا كبير
برغم ان مفيش اى حاجة اتغيرت ولا أى جديد حصل
بس مش عارفة ليه حسيت بأن فى حاجات كتير كويسة ممكن تحصل
المهم انى اكون مؤمنة بأنها هتيجى وتسمع صوتى وهى جاية من بعيد
لانى لسه عايشة ومش عايزة اموت وانا عايشة
يمكن تكون الحالة اللى انا فيها دلوقتى مجرد شوية وقت
وهارجع تانى متكسرة ومتفتفتة
بس حبيت اترجم الحالة ديه لشوية كلمات
وارميهم جوه فقاعة صابون زى الأطفال واطيرها
وأول ما تنفجر الفقاعة الحالة ديه تنشر احساس الكلمات فى الهوا اللى حواليا
يمكن لما اضعف جدا واحتاج للحالة ديه من تانى ومعرفش الاقيها
لو حاولت استدعيها الهوا اللى حواليا فى وقت ضعفى
يقدر يساعدنى ويجيبلى جزيئاته اللى شايلة كلماتى
:
اللهم امنحنى السكينة لأتقبل الأشياء التى لا استطيع تغييرها
والشجاعة لتغيير الأشياء التى استطيع تغييرها
والحكمة لمعرفة الفرق بينهما
:
بى.اس: لازم ارجع اسيب قلم فى شنطتى من تانى واكون واثقة فى كلماتى انها ممكن ترجعلى فى اى وقت حتى ولو غابت وقت طويل
ــــــــــــــــــــــــــــــــــــــــــــــــــ
* العنوان من غنوة اوقات لمحمد فؤاد
14 comments:
أحجز أول تعليق
لا
المشكلة مش فى القلم
المشكلة جواكى انتى
حاولى تهدى وتسترخى من تانى وانتى هتلاقى الكلام رجع من جديد
بلاش دورى على الكلام
خليه يخرج طبيعى من جواكى وبسهولة
ومن غير تكلف بيبقى اجمل بكتيييييييييير جدا
تحياتى ودعائى
البوست روعة بجد
وأثر فيا
مي .. حافظي علي الحاجات اللي لسه عارفه تعمليها ..
وخليكي زي مانتي عندك امل في بكره .. ارمي كل حاجه ورا ضهرك وبصي لبكره بأمل .. ومتموتيش نفسك زي ما قلتي وانتي عايشه ..
بس ان شاء الله هتكون شويه وقت بس مش هترجعي متكسره .. لا .. هترجعي أقوي من الاول بكتير ..
وترجمي حالتك .. واصرخي واكتبي .. متكبتيش اي حاجه جواكي يا مي ..
اللهم امنحنى السكينة لأتقبل الأشياء التى لا استطيع تغييرها
والشجاعة لتغيير الأشياء التى استطيع تغييرها
والحكمة لمعرفة الفرق بينهما
الله
حلوه اوي الدعاء ده ..
اللهم امين :)
يارب تكوني بخير
وربنا معاكي يارب ..
اوقات كتيره مش بحتاج لقلم بس علشان نرجع نكتب تانى
لا بنحتاج لنفس جديده تتقبل الجديد
تتذكر القديم بدون شجن او حزن
مهما حصل وهيحصل نكون متأكدين ان ربنا بيختار لينا الصالح لينا
والخير
ونرضى بكدا
نعرف نعيش ونكمل بروح صافيه وطايره
انا بنصحك تغيرى جو او صحبه
او تقرى كتاب ممتع
دمتى بكل الود
بخير
:))
ربنا يعملك كل خير.. و يرضيكي ويراضيكي
الازهرى
اتشرف انك تكون اول تعليق
هى فعلا المشكلة جوايا بس يمكن لان المشكلة كبيرة ومش قادرة اتحرك او اول مرة احس انى ضعيفة بالشكل ده
مش بحاول ادور على الكلام
لكن اوقات بحتاج مساعدة الكلمات انها تخرج من جوايا لكنها بتفضل محبوسة جوايا وبتهرب اول ما تحس انها هتخرج
.. الكلمات تفشل احيانا ..
لكنى مش هافقد ثقتى فيها .. هو ده اللى كنت بفكر نفسى بيه
تحياتى دوما
اشكرك على تواصلك ودعائك
__________________
محمد
:)
تشرفنى زيارتك دوما
_________________
هاجر
اوقات كتير حاجات حوالينا هى اللى بتحاول تقتلنا واحنا عايشين لمجرد انك مش بتمشى ورا القطيع
ربنا يتقبل دعائنا جميعا ان شاء الله
محبتى
بسنت
فعلا مش القلم هو اللى محتاجاه .. لكنى محتاجة بعض السكينة
هعمل بنصيحتك :)
تسعدنى زيارتك حقا
دمتى بكل الخير
______________
تسنيمة
لا تدرى كم يسعدنى مرورك
وكم اسعدنى اكثر دعائك
اللهم ارضنا جميعا لما تحب وترضى
محبتى دوما
اللهم امنحنى السكينة لأتقبل الأشياء التى لا استطيع تغييرها
والشجاعة لتغيير الأشياء التى استطيع تغييرها
والحكمة لمعرفة الفرق بينهما
كلمات جميلة جدا فعلا وهي بتلخص تقريبا كل اللى انت عايزه تقوليه ربنا يتقبل منك ويبعد عنك الاحزان
ادعوك ان تكتشفى السعادة التى بداخلك وان تستمرى في زرع روح التفاؤل حواليكي
مع انك كاتبة انك هاترجعي تحطي قلم في شنطتك من تاني بس فعلا انا مش شايفة ده حصل .... يلا بقا مستياكي ترجعي
عنوان البوست دليلك
انت مش محتاجة ايمان جديد او مبررات جديدة للحياة و الاحساس بجمال الاشياء و تجددها يا مي .. و عشان كده بدأت الكلام باندفاع و تاكيد لمقوماتك ..
و الانسان بهذه المقومات الراسخة في روحه لا يسقط أبدا الا لينهض من جديد و يعاود الانطلاق بامل و عزم متجدد .. و لست بحاجة لصناعة الفقاعات لو أن الايمان في قلبك يبرق دائما ليضئ ظلام أوقاتك الموحشة
انا فقط أخشي أن يكون ضعفك نتيجة للاسراف في الايمان ذاته .. في التعاطف أو توقع الخير و الجمال خلف كل الاقنعة و الابواب .. و لا يمكنني أن أنصحك لتكوني أقل ايمانا و عاطفة أو احساسا رهيفا بالأشياء .. فهو شئ لا يكتسبه الانسان او يتاثر به لو أراد .. و لكن تبعا لظروفه و تفاعله مع التجارب التي يمر بها و مدي تأثيرها به قد يصل علي الاقل لحالة من الاتزان . فقط .. أنا أتمني أن تعودي لاستقرارك قريبا و لتكوني في أفضل حال دائما
كوني بخير
الامل حلو اوي ولو راح يبقي الموت بعينه
اقعدي لوحدك وخدي نفس عميييييييييق وعيدي ترتيبك هتحسي براحه وفرق كبييييييييييير
dalia
اللهم تقبل منا جميعا
بدات فى المحاولة من جديد ولم افقد الامل بعد
وحشتينى على فكرة متغيبيش
_______________
osha
:)
حاضر يا فندم
ysf
يوسف .. لا ادرى كم مرة قرات كلماتك
ولكنها حقا ساعدتنى كثيرا واسعدتنى ايضا
وجعلتنى افكر ايضا وقد تكون محقا فى بعض مما قلت
اود ان اشكرك كثييرا جداااا
وسأكون بخير :)
انتظر جديدك .. تحياتى دوما
__________________
كيارا
فعلا مفيش حياة من غير امل
منورانى دايما
Post a Comment