Monday, December 31, 2007

الدنيا ريشة فى هوا

احتارت اقول ايه لـ 2007 وهى ماشية او اوصفها بايه
بس لقيت ان انسب وصف ليها هو انها سنة جديدة
مقدرش اقول كلها سعيدة بس حصلتلى فيها حاجات كتير جديدة عليا
عرفت افكار جديدة واكتشفت فى نفسى حاجات كتير مكنتش اعرفها

وفهمت فيها يعنى ايه حياة وناس وشغل وامل وحزن وفرح
وحسيت بحاجات لاول مرة احسها

حسيت ازاى ممكن تكون فى منتهى الحزن وازاى تكون فى منتهى الفرح
وازاى تتنقل ما بين الاحاسيس بسرعة جدا من غير ما تعرف السبب

عرفت المدونات واتعرفت فيها على ناس كتير من افكارهم
حبيتهم جدا من غير ما اشوفهم واتبسطت قوى لما لقيت ناس كتير بيقولوا نفس الاحساس اللى بردده جوايا ومش بعرف اترجمه لكلام
دايما بحس فى وسط كلامهم انى مش غريبة عنهم


النهاردة و فى اخر يوم فى 2007 اول حاجة جت على بالى الصبح كلام منير
ياللى بتسال عن الحياة خدها كده زى ما هيه
فيها ابتسامة وفيها اه .. فيها اسية وحنية

دنيا تدور مهما تدور
ماهى بتدور سواقينا
فى عطشنا ..فى المنا.. مابتنساش تداوينا
لينا الحب لينا .. قبل الجراح ما تدق بابنا
جينا ومادين ايدينا .. اللى يصيبنا اهو من نصيبنا

دنيا بتلعب بينا ايه
ايه راح ناخد من ده ايه


عاوزة اقول لـ 2007
شكرا جدا وانا حبيتك قوى بكل حاجة فيكى

واخر حاجة هعملها ان شاء الله فى اخر لحظات السنة
انى ابتسم ابتسامة كبيرة من قلبى
واصلى ركعتين فى اخر دقايق السنة احمد ربنا فيها
وادعى يحققلى كل اللى اتمناه فى 2008

2 comments:

AHMED SAMIR said...

كل سنة وانتي طيبة
وان شاء الله زي النهاردة السنة اللي جاية نكون بنتكلم عن 2008 باحسن ما بنتكلم النهاردة عن 2007
عموما انا في رأيي ان 2007 كانت سنة في منتهى التقليدية..متعادلة يعني شفنا فيها احداث واحداث بس الحمد لله ماكانش فيها احداث دراماتيكية قوي
كل سنة والكل بخير

raspoutine said...

ربنا يجعلها سنة سعيدة عليكى وعلى كل المسلمين ان شاء الله
وشكرا لزيارتك